Gipahigayon sa kapulisan ug kasundalohan ang usa ka operasyon batok sa usa ka wanted nga lider sa armadong grupo sa Barangay Pantar, Banisilan, Cotabato, nga miresulta sa pagkamatay sa upat ka suspek sulod lamang sa duha ka adlaw.
Base sa report sa mga otoridad, gituyo sa mga operatiba ang pagserbisyo og mga warrant of arrest batok kang alyas “Commander Tanda,” nga nag-atubang og mga kaso lakip ang multiple murder, frustrated murder ug illegal possession of firearms. Apan, nisangpot sa armadong komprontasyon ang operasyon human giingong misukol ug mipusil ang iyang mga kauban ngadto sa tropa.
Tulo ka miyembro sa grupo ang napatay sa unang engkwentro ug laing usa sa misunod nga operasyon. Usa usab ka suspek ang nadakpan ug nakuhaan og armas. Padayon ang operasyon batok sa ubang sakop sa grupo nga giingong nalambigit sa ilegal nga mga kalihokan ug sa pagsuporta sa mga nahibiling miyembro sa Dawlah Islamiya.
