Moabot sa kapin P3-M nga pinansiyal nga tabang ang personal nga gihatag ni Cebu Gov. Pamela Baricuatro ngadto sa 22 ka barangay sa lalawigan sa Sugbo aron suportahan ang ilang mga programa, proyekto, ug mga prayoridad sa komunidad.
Mokantidad og gikan sa P50,000 ngadto sa P250,000 ang gihatag sa mga barangay sa upat ka distrito sa Sugbo.
Lakip sa mga nakadawat ang upat ka barangay sa ikatulong distrito, usa ka barangay matag usa sa Ikaupat ug Ikalimang Distrito, ug 16 ka barangay sa Ikapitong Distrito.
Sumala sa kagamhanan sa probinsiya nga ang maong pondo gamiton sa nagkalain-laing proyekto sama sa socio-cultural activities ug sa pagpalit og mga kagamitan lakip ang mga lamesa, lingkuranan, ug mga tolda alang sa mga kalihokan sa barangay.
Matud sab sa gobernadora, ang padayon nga paghatag og pinansyal nga tabang kabahin sa paningkamot sa provincial government sa pagpalig-on sa mga barangay pinaagi sa pagsuporta sa mga proyekto nga direktang makatubag sa panginahanglan sa ilang mga komunidad.
Photo courtesy: Cebu Province
