Kapin sa 23,000 ka tanom nga marijuana nga adunay gibanabang kantidad nga ₱6 milyon ang nadiskubre ug gipukan sa mga otoridad atol sa hiniusang anti-illegal drug operation nga gipahigayon niadtong Hulyo 4, 2026 sa Sitio Bonlak, Barangay Kasapa 1, Loreto, Agusan del Sur.
Ang operasyon, nga gilunsad ubos sa COPLAN EVEREST-FOXTROT, gipangunahan sa Loreto Municipal Police Station uban sa Philippine Drug Enforcement Agency (PDEA)–Agusan del Sur Provincial Office, 2nd Provincial Mobile Force Company, Provincial Intelligence Unit sa Agusan del Sur, ug Alpha Company, 60th Infantry Battalion, Philippine Army.
Sumala sa mga otoridad, ilang nadiskubre ang usa ka plantasyon nga naglangkob sa gibana-banang 23,431 ka guwang nga tanom sa marijuana nga gitanom sa usa ka luna nga adunay gilapdon nga mokabat sa 16,000 square meters.
Sa inisyal nga imbestigasyon, giingong ang maong plantasyon gi atiman sa usa ka mag-uuma nga nailhan lamang sa angga nga “Dodong,” residente sa Sitio Bonlak, Barangay Kasapa 1. Padayon pa karon ang operasyon sa kapulisan aron madakpan ang suspetsado nga nagpabiling naka-ikyas sa mga otoridad.
Gidokumento una sa mga operatiba ang tanang ebidensya sa wala pa gisunog ang mga tanom sa lugar, subay sa gitakdang pamaagi sa operasyon.
Matud pa sa kapulisan, ang kalampusan sa operasyon bunga sa lig-on nga koordinasyon tali sa mga law enforcement agencies, lokal nga panggamhanan, ug mga miyembro sa komunidad sa kampanya batok sa ilegal nga droga.
Gidasig usab sa mga otoridad ang publiko nga magpadayon sa paghatag og kasayuran ngadto sa kapulisan aron mapalig-on pa ang kampanya batok sa ilegal nga droga ug mapadayon ang kalinaw, kaluwasan, ug usa ka komunidad nga gawas sa impluwensya sa ilegal nga droga.
Photo courtesy: Loreto MPS
