Nadakpan sa hiniusang operasyon sa kapulisan ang usa ka Top 6 Most Wanted Person sa regional level nga giakusahan sa kasong murder, sa Purok 5-A, Barangay Bayugan 3, Rosario, Agusan del Sur niadtong Hulyo 2, 2026, alas 10:50 sa buntag.
Ang operasyon gipahigayon sa mga personahe sa 2nd Agusan del Sur Provincial Mobile Force Company (PMFC), Regional Intelligence Unit 13, Rosario Municipal Police Station, ug Carrascal Municipal Police Station.
Ang nadakpan giila lamang sa ngalan nga Raphy, 23 anyos, usa ka laborer ug residente sa Barangay Adlay, Carrascal, Surigao del Sur.
Gisikop siya pinaagi sa Warrant of Arrest alang sa kasong Murder ubos sa Article 248 sa Revised Penal Code, nga adunay Criminal Case No. C-2795. Ang maong warrant gi-isyu niadtong Hunyo 17, 2026 ni Hon. Catalina Shineta Matildo Tare-Palacio, Presiding Judge sa Regional Trial Court, Branch 41 sa Cantilan, Surigao del Sur. Walay piyansa nga girekomenda alang sa iyang temporaryong kagawasan.
Sa pagkakaron, anaa na sa kustodiya sa Rosario Municipal Police Station ang nadakpan alang sa dokumentasyon ug sa hustong legal nga proseso.
Photo courtesy: SecondAgusandelsur Pmfc
