Gimando sa City Peace, Development, and Security Council ngadto sa 21st City Council ang hinanaling pagpasa og resolution nga hugot nga mag-establisar sa mga tunghaan isip peace zone, human na sab sa makalilisang nga panghitabo sa Tacloban City National High School.
Sa iyang special report, gibutyag ni Konsehal Jonjon Rodriguez nga usa kini sa nahisgutan atol sa ilahang full council meeting nga gisalmutan sa nagkadaiyang stakeholders.
Gisaysay sab ni Rodriguez nga bisan ang dakbayan, nag-atubang sab sa susamang sitwasyon kung asa mismong mga magtutungha ang nalambigit sa mga school-based violence, sama nalang sa problema sa gangsterism ug kaylap nga kaso sa bullying.
Alang kang Rodriguez, dakong hagit kanila ang pagmugna og lig-on ug konkretong mga intervention programs aron nga mapugngan ang pagtaas sa school-based violence sa syudad.
Aminado sab si Rodriguez nga dili paigo ang pagmugna lang og balaud sa pagpugong sa karahasan sulod sa tunghaan, busa labing gikinahanglan nga mubarog dili lang ang gobyerno apan tibuok komunidad ang angay nga mulihok aron nga masiguro ang kaluwasan sa mga magtutungha.
