Nagkadako ang panawagan sa pipila ka netizens nga tangtangon ang drag queen nga si Maxie Andreison sa cast sa Die Beautiful: The Musical human mikatag ang usa ka karaang video nga nagpakita kaniya nga mikarate sa usa ka transgender woman.
Sa iyang live giangkon ni Maxie nga siya ang naa sa viral video apan gipasabot niya nga nahitabo kini tulo ka tuig na ang milabay sa Cabanatuan. Matud niya, nahuman na ang isyu pinaagi sa pagpasayloay sa duha ka panig ug giila usab niya nga sayop ang iyang gibuhat.
Nangayo siya og pasaylo sa publiko ug miingon nga daghan na siyang nakat-unan gikan sa maong panghitabo ug naningkamot nga bag-ohon ang iyang pamatasan.
Sa laing bahin, nagpagawas usab og pamahayag ang management ni Maxie nga wala nila depensahi ang kasaypanan apan ilang giklaro nga sa wala pa ang insidente, gisubli-subli og paglapas ang personal nga luna sa performer pinaagi sa paghikap, paggukod ug pagbira sa iyang wig. Giingon usab nila nga nahusay na sa pribado ang maong isyu sa mga nalambigit.
Hangtod karon, wala pa magpagawas og opisyal nga pamahayag ang producer sa Die Beautiful: The Musical kabahin sa mga panawagan nga tangtangon si Maxie sa cast sa musical nga ipasundayag sa Hunyo 2027.
Photo Courtesy: Spotify/FB Pageant Mag Philippines
