Gipasidunggan sa Tagum City Jail – Female Dormitory ang mga Persons Deprived of Liberty (PDLs) atol sa Alternative Learning System (ALS) Graduation Rites ug Moving-Up Ceremony nga gihimo ala 1:30 sa hapon niadtong Hunyo 29, 2026 sa TCJ-MD Covered Court.
Tulo ka PDL ang nakagradwar sa elementarya samtang usa ang nahuman sa Junior High School, isip kabahin sa paningkamot sa BJMP ug Department of Education sa paghatag og ikaduhang higayon sa edukasyon.
Sa maong kalihokan, gihatag ni Acting City Jail Warden JSINSP Ofelia P. Lapas ang mensahe sa pagdasig sa mga migradwar ug completer nga ipadayon ang paggamit sa ilang kahibalo, kahanas ug maayong pamatasan aron mahimong produktibo ug responsable nga mga miyembro sa katilingban sa ilang paggawas sa pasilidad.
Giubanan usab sa mga jail custodial personnel ang mga PDL nga mitambong isip ilang mga escort. Gipangunahan ni School Principal Bernardino E. Mejos ang opisyal nga pagkumpirma sa mga graduates ug completer, diin iyang gipadayag nga malampuson nilang natuman ang tanang akademikong kinahanglanon sa ALS.
Gisundan kini sa pagdawat ni Dr. Leila L. Ibita, Division ALS Focal Person, nga midayeg sa determinasyon sa mga estudyante ug nagpasalamat sa walay hunong nga suporta sa mga magtutudlo sa ALS, BJMP personnel ug mga kaabag sa programa.
Sa mensahe nga gidala ni Public Schools District Supervisor Ross Chito G. Palo alang kang Schools Division Superintendent Alona C. Uy, CESO V, gipasiugda ang dakong papel sa Alternative Learning System sa paghatag og inklusibo ug flexible nga edukasyon.
Sumala sa BJMP, ang maong programa nagtumong sa paghatag sa mga PDL og akses sa edukasyon ug mga kahigayonan sa tibuok kinabuhi aron maandam sila nga mahimong mapuslanong miyembro sa katilingban sa ilang pagbalik sa komunidad.
Photo Courtesy: BJMP Tagum City Jail – Female Dormitory
