Giklaro sa Kagamhanang Probinsyal sa Misamis Oriental nga dili eksklusibo alang sa mga empleyado sa kapitolyo ang bag-ong tennis ug pickleball court nga bag-o lang giablihan sa Provincial Capitol Grounds.
Sumala ni Provincial Administrator Ruel Gayoso, gitukod ang nahisgutang sports facilities aron mapahimuslan sa mga kabatan-onan ug mga atleta nga gustong molambo sa ilang talento sa tennis ug pickleball.
Gibutyag usab ni Gayoso nga libre ang paggamit sa pasilidad ug walay bayad alang sa mga magdudula nga gustong mag-ensayo ug magdula niini.
Matud pa nga tumong sa proyekto nga mahatagan og kahigayonan ang mga atleta nga walay kapasidad sa pag-abang sa mga pribadong court nga adunay mahal nga bayronon.
Gilauman sa kagamhanang probinsyal nga makatabang ang pasilidad sa pagpalambo sa sports development ug sa pagdiskubre sa bag-ong mga talento gikan sa Misamis Oriental.
Photo courtesy: Misamis Oriental Provincial Information Office
