Mokabat P1.14 million nga kantidad sa mga smuggled nga mga sigarilyo ang nakumpiska sa mga otoridad sa gilunsad nga seaborne patrol operation sa may kadagatang bahin sa Barangay Muricay, Pagadian City, adlaw’ng Dominggo, Hunyo 14, 2026.
Gilusad ang operasyon sa pagpanguna sa mga personahe sa Pagadian City Police Station, Zamboanga del Sur Maritime Police Station, 902nd Regional Mobile Force Battalion 9, ug Zamboanga del Sur Provincial Unit nga miresulta sa pagkasikop usab sa duha ka suspetsado nga managsamang residente sa Malabang, Lanao del Sur.
Lakip sa nakumpiska gikan kanila ang 20 ka kaha sa mga cigarette products nga gilangkuban sa napulo ka master cases sa Cannon Menthol, walo ka master cases sa Astro, ug duha ka master cases sa Fort cigarettes ug ang motorized pump boat nga gikargahan sa maong mga sigarilyo.
Ang tanang nakumpiska nga mga butang lakip ang dinakpan nga mga indibidwal anaa na karon sa Zamboanga del Sur Maritime Police Station alang sa saktong proseso ug tukmang lakang.
Samtang giandam na usab karon ang kasong may kalabutan sa Republic Act No. 10643 kon Graphic Health Warnings Law.
Photo Courtesy:ZSPPO – PIO-9
