Bukog na nga nakaplagan ang usa ka 73-anyos nga giilang si alyas “CORING” , residente sa Caibiran, Biliran human positibo nga giila sa iyang anak nga lalaki pinaagi sa mga sinina nga narekober didto sa Brgy. Kawayanon, Caibiran, Biliran, pasado alas 4:00 ang takna sa hapon kagahapong adlawa, Hunyo 12, 2026.
Sumala pa sa imbistigasyon sa kapulisan, upat na kabulan nga gikatahong nawala ang biktima sukad pa niadtong Enero 13, 2026 ug hingpalgan kini gumikan sa pagtaho sa kapitan sa naasoy nga brgy. ngadto sa Caibiran Municipal Police Station mahitungod sa nakit-ang mga bukog sa tawo sa ilang lugar.
Sa dihang miresponde ang mga pulis uban sa Caibiran BFP Emergency Medical Service ug Caibiran Rescue Service, ilang nadiskobrehan nga nagkatag ug nagkabulag-bulag na ang mga bukog ug buhok sa biktima.
Sa pagkakaron, gitugyan na ang bukog ngadto sa iyang pamilya aron sa hustong paghipos niini.
