Nagpadala og duha ka water tanker ang City Government of Kidapawan ngadto sa General Santos City aron maghatag og limpyo ug maiinom nga tubig sa mga residente nga naapektuhan sa kusog nga linog.
Sumala sa City Government, nasayran nila ang dako nga panginahanglan sa tubig ilabina nga adunay mga linya sa suplay sa tubig nga nadaot tungod sa kusog nga paglinog nga miigo sa dakong bahin sa rehiyon.
Ang gipadala nga mga water tanker adunay kapasidad nga 9,000 litro ug 3,000 litro, pinaagi sa paningkamot sa City Social Welfare and Development Office (CSWDO) ug sa Metro Kidapawan Water District.
Gibutyag usab sa lokal nga panggamhanan nga magpadala pa sila og dugang nga ayuda alang sa ubang mga komunidad nga grabeng naapektuhan sa magnitude 7.8 nga linog nga miigo sa habagatang bahin sa Mindanao niadtong Hunyo 8.
Padayon ang koordinasyon sa City Government sa mga hingtungdan nga ahensya aron maseguro ang dali nga paghatag og tabang sa mga komunidad nga nanginahanglan og suporta human sa maong kalamidad.
