Nabalik sa tag-iya ang kantidad nga Php136,000.00 human kini aksidenteng mabilin sa tricycle nga gisakyan ni Ma’am Judalyn L. Palen, residente sa Socorro, Surigao del Norte. Diha-diha niyang gitaho sa Surigao Component City Police Station ang pagkawala sa kwarta aron mangayo og tabang sa pagpangita niini.
Giaksyonan sa mga sakop sa Theft and Robbery Unit sa SCCPS pinaagi sa pagpahigayon og pagpangita ug imbestigasyon aron matultolan ang posibleng nahimutangan sa maong kwarta.
Samtang sa pikas nga bahin, giturn-over ni Jose S. Conte sa Barangay San Juan, Surigao City ngadto sa mga kapulisan nga adunay iyang nakit-an nga brown envelope duol sa Luneta Park.
Human sa beripikasyon, napamatud-an nga kini mao ang envelope nga adunay sulod nga kwarta nga gipanag-iyahan ni Ma’am Judalyn. Nagpahayag og dakong pasalamat si Ma’am Judalyn kang Conte tungod sa iyang pagkamatinud-anon ug maayong kasingkasing.
Gipahinumdoman ang publiko nga ang pagkamatinud-anon, responsibilidad, ug kooperasyon maoy pundasyon sa lig-on ug malinawon nga komunidad.
