Kapin sa 350 ka Sangguniang Kabataan (SK) officials gikan sa tibuok Caraga Region ang aktibong miapil sa kalihukan nga “Champions for Change: Empowering Caraga’s Youth for a Drug-Free Future” nga gihimo kagahapong adlawa, Hunyo 9,2026.
Ang maong inisyatiba gipangunahan sa Department of the Interior and Local Government (DILG) Caraga isip kabahin sa padayon nga kampanya sa pagpalig-on sa partisipasyon sa kabatan-onan alang sa luwas ug drug-free nga mga komunidad.
Sa maong aktibidad, lain-laing resource speakers gikan sa mga ahensya sa gobyerno ug partner offices ang mihatag og updates mahitungod sa sitwasyon sa illegal nga droga sa rehiyon. Gihisgutan usab nila ang mga probisyon sa Republic Act No. 9165 o ang Comprehensive Dangerous Drugs Act of 2002.
Gitutokan sa sesyon ang paghatag og kahibalo sa mga batan-ong lider mahitungod sa peligro sa ilegal nga droga, mga paagi sa pagpugong niini, ug ang importante nga papel sa kabatan-onan sa pagpalambo sa awareness, partisipasyon sa komunidad, ug responsable nga pagpangulo.
Gilauman sa DILG Caraga nga pinaagi sa maong mga kalihukan, mas mapalig-on pa ang kabatan-onan isip kaabag sa pagpadayon sa usa ka luwas, malinawon, ug drug-free nga katilingban sa rehiyon.
Photo courtesy: PIA Caraga
