Naharang sa kapulisan ang usa ka giabangan nga sakyanan nga giingong nalambigit sa “rentangay” scheme atol sa operasyon nga gihimo didto sa Galas Feeder Port sa Dipolog City sa miaging adlaw.
Sumala pa nga nakadawat og report ang Dipolog City Police Station (CPS) gikan sa Philippine Coast Guard mahitungod sa usa ka Toyota Vios nga gireklamo sa tag-iya nga gidala gawas sa gisabutan nga lugar nga wala sa iyang kahibalo ug pagtugot.
Nadiskubrehan sa tag-iya sa sakyanan nga taga-Cebu City, pinaagi sa GPS tracking system nga ang sakyanan sakay sa MV Lite Ferry 12 gikan sa Oslob, Cebu padulong sa Dipolog City. Human makumpirmar ang lokasyon sa sakyanan nangayo na kini og tabang sa mga awtoridad.
Tungod niini, gilusad dayon sa Dipolog CPS uban sa Philippine Coast Guard, Coast Guard K9 Unit ug Zamboanga del Norte Maritime Police Station, ang usa ka interdiction operation sa pantalan.
Pag-abot sa barko, malampusong na rekober sa joint operating teams ang maong sakyanan sulod sa car deck sa ferry vessel.
Nasayran nga adunay duha ka lalaki nga sakay sa sakyanan sa dihang kini naharang. Ang drayber usa ka 47-anyos nga residente sa Molave, Zamboanga del Sur, samtang ang iyang kauban usa ka 31-anyos nga residente sa Barangay Sanito, Ipil, Zamboanga Sibugay.
Gidala ang duha sa Dipolog CPS alang sa imbestigasyon lakip na ang narekover nga sakyanan.
Photo Courtesy:Dipolog CPS
