Gipahibalo ni Mandaue City Mayor Thadeo ‘Jonkie’ Ouano, nga andam ang lokal nga kagamhan sa dakbayan sa Mandaue sa paghatag og pinansyal nga tabang ngadto sa mga residente nga naapektuhan sa magnitude 7.8 linog nga miigo sa General Santos City kagahapong adlawa.
Matod sa mayor, cash assistance ang gikonsiderar nga labing praktikal nga paagi sa pagtabang tungod kay mas nahibal-an sa mga lokal nga otoridad sa General Santos ang labing dinaliang panginahanglan sa mga biktima.
Dugang pa niya nga mahimong lisod ang pagpadala og mga personnel ngadto sa lugar tungod sa kalay-on niini gikan sa Mandaue.
Hinuon, wala pa matino ang kantidad sa tabang nga ihatag sa syudad tungod kay kinahanglan pa kini hisgutan ug aprobahan sa Mandaue City Council.
Padayon pa ang mga diskusyon sa lokal nga kagamhanan kabahin sa labing epektibong paagi sa pagsuporta sa mga komunidad nga naapektuhan sa maong linog.
Photo courtesy:wikipedia
