Nadakpan ang usa ka 22-anyos nga lalaki nga giila lamang sa alyas nga “Jayson” sa kapulisan human nalambigit sa kaso sa carnapping sa usa ka motorsiklo nga gikatahong gikuha nga walay pagtugot sa tag-iya.
Base sa report sa Tagum City Police Station (CPS), niadtong alas-3:00 sa hapon sa Hunyo 3, 2026, misumbong sa kapulisan si Rosario Sevilla Saldua nga nawala ang iyahang RUSI 125 nga motorsiklo nga rehistrado ug adunay plaka.
Human sa inisyal nga imbestigasyon, nasayran nga ang motorsiklo gikatahong gikuha sa iyang trabahante nga si “Jayson,” usa ka ulitawo ug residente sa Purok 4, Maliko, Pantukan, Davao de Oro.
Padayon nga nakigkoordinar ang complainant sa kapulisan alang sa posibleng pagrekober sa iyang motorsiklo, alas-11:30 sa buntag sa Hunyo 4, 2026, miuban ang usa ka mobile patrol team sa Tagum PNP ngadto sa complainant human makadawat og impormasyon kabahin sa posibleng nahimutangan sa suspek.
Tungod sa operasyon, malampusong nabawi ang motorsiklo ug nadakpan ang suspek alas-1:15 sa hapon sa samang adlaw duol sa Tagum City.
Gipahibalo usab sa kapulisan ang suspek sa iyang mga katungod sumala sa balaod. Sa pagkakaron ang nadakpan nga suspek ug ang nabawi nga motorsiklo gidala na sa Tagum PNP alang sa hustong disposisyon ug dugang nga legal nga proseso.
Photo Courtesy : Findlaw
