Malampusong nahimo sa Cebu Provincial Hospital (CPH) Danao ang labing una nga Total Hip Replacement Surgery, usa ka mahinungdanong kalampusan sa pagpalapad sa serbisyo sa orthopedic sulod sa sistema sa panglawas sa Probinsiya sa Sugbo.
Matod ni Capitol Piso Health Consultant Dr. Nikki Catalan nga ang makasaysayanong operasyon gihimo niadtong Hunyo 5 sa 36-anyos nga babaye nga pasyente nga nasakit og Avascular Necrosis (AVN), usa ka kondisyon diin mamatay ang tisyu sa bukog tungod sa kakulang sa suplay sa dugo. Ang iyang kahimtang mitumaw isip komplikasyon sa dugayng paggamit og steroid alang sa pagtambal sa Systemic Lupus Erythematosus (SLE).
Ang operasyon gitawag og Total Hip Arthroplasty o Total Hip Replacement, naglakip sa pagtangtang sa nadaot nga hip joint ug pag-ilis niini og artipisyal nga implant. Ang maong pamaagi gituyo aron mawagtang ang kasakit, mapasig-uli ang lihok sa lawas, ug mapaayo ang kinatibuk-ang kalidad sa kinabuhi sa pasyente.
Ang maong operasyon mokantidad og mokabat sa ₱500,000, lakip na ang implant ug professional fees sa mga doktor. Apan sa maong kaso, walay gibayran ang pasyente ug libre niyang nadawat ang tibuok operasyon.
Gihulagway ni Dr. Catalan ang operasyon isip usa ka dakong kalampusan alang sa CPH Danao ug usa ka dako nga lakang aron mas mapaduol ang advanced orthopedic care ngadto sa mga lumulupyo sa probinsiya.
Ang maong aksyon kabahin sa padayong paningkamot sa administrasyon ni Cebu Gov. Pamela Baricuatro sa pagpalig-on sa orthopedic services sa tanang tambalanan ubos sa probinsiya.
Photo courtesy: Cebu Province
