Padayon karon ang gihimong clearing operations sa Provincial Government sa South Cotabato pinaagi sa Office of the Provincial Disaster Risk Reduction and Management Officer (OPDRRMO) ug sa Office of the Provincial Engineer (OPE) sa dapit nga naigo sa landslide sa Sitio T’daan Kini, Barangay Lamlahak, Lake Sebu, human sa nahitabong pagdahili sa yuta niadtong milabayng semana.
Nagpabilin nga naka-deploy sa maong dapit ang mga heavy equipment ug mga response personnel aron hawanan ang mga nangatumpag nga yuta ug basura, ibalik ang kaayohan sa dalan, ug masiguro ang kaluwasan sa mga lumulupyo lakip na sa mga motorista nga lumalabay sa naasoyng komunidad.
Aron masiguro nga dili mabalda ang trabaho, nag-alokar ang OPDRRMO og 1,000 ka litro nga krudo (fuel) alang sa mga heavy equipment nga gigamit sa Office of the Provincial Engineer. Katuyoan niini nga masuportahan ug mapaspasan ang padayong pagpanglimpyo ug rehabilitasyon sa mga naapektuhang dalan ug kasikbit nga imprastruktura.
