Gipahugtan pa sa Iligan City Waterworks System (ICWS) ang kampanya kontra sa illegal water connection pinaagi sa operasyon nga “Bantay Agas” ilawom sa pagdumala ni Acting Department Head Engr. Hubert C. Reyes.
Matod pa sa opisyal, ang maong operasyon nagtutok sa pagpangita ug pagpahunong sa mga iligal nga koneksyon ilabi na kadtong walay water meter ug kadtong wala miagi sa opisyal nga proseso sa opisina.
Sa bag-ohay nga operasyon, sa niaging adlaw Hunyo 3, 2026, 13 ka illegal water connections ang nadiskubre sulod sa usa ka adlaw, lakip na ang mga kaso sa Palao area ug usa ka water line nga wala’y dokumento ug tarong nga meter.
Gipasabot sa ICWS nga ang maong mga kalihukan klaro nga paglapas sa ilang mga regulasyon ug mahimong hinungdan sa pag-isyu og official notice ngadto sa mga tag-iya sa koneksyon.
Sumala pa sa ahensya, tan-awon pa nila ang klase sa paglapas aron mahibal-an ang angay nga aksyon ug posibleng penalties nga ipahamtang.
