Nagpagawas og pahimangno ang Philippine Coconut Authority (PCA) ngadto sa mga tag-iya sa yuta ug mga mag-uuma nga dili mahimong magputol og kahoyng lubi nga walay tukmang permit ug pag-apruba gikan sa mga otoridad.
Sumala sa PCA, ubos sa Republic Act 8048 nga giusab pinaagi sa Republic Act 11524 o Coconut Farmers and Industry Trust Fund Act ug Coconut Preservation Act, kinahanglan sundon ang legal nga proseso sa dili pa tugotan ang pagputol sa mga kahoyng lubi.
Gipasabot sa ahensya nga ang bisan kinsang mapamatud-ang nagputol og lubi nga walay permiso mahimong atubangon ang kaso nga adunay silot nga multa gikan P200,000 hangtod P500,000 ug pagkabilanggo sulod sa duha hangtod lima ka tuig.
Matod ni Engr. Faiz Macakiling, ang mga aplikante kinahanglan una nga makahatag sa mga gikinahanglang dokumento sama sa pamatuod sa pagpanag-iya sa yuta, barangay certification, ug uban pang legal nga rekisitos.
Dugang niya, kung ang yuta sakop sa agricultural land, kinahanglan usab nga moagi sa tukmang proseso ug clearance gikan sa Department of Agrarian Reform (DAR) sa dili pa mahatagan og permit sa pagputol.
Gidasig sa PCA ang publiko nga mokonsulta una sa ilang lokal nga opisina aron malikayan ang paglapas sa balaod ug masiguro nga legal ug hapsay ang bisan unsang kalihokan nga may kalabotan sa pagputol sa mga kahoyng lubi.
