Gipahibalo sa 4th Infantry (Diamond) Division sa Philippine Army nga hingpit nang nabungkag ang Northeastern Mindanao Regional Committee (NEMRC) sa Communist Terrorist Group (CTG) human misurender ang tanang nabiling miyembro niini ngadto sa pwersa sa gobyerno.
Sumala sa militar, niadtong Mayo 28, 2026, misurender ang lima ka nabiling miyembro sa NEMRC ngadto sa hiniusang pwersa sa 401st Infantry Brigade ug Philippine National Police-Special Action Force (PNP-SAF) sa lungsod sa Tagbina, Surigao del Sur.
Sa wala pa kini, niadtong Mayo 27, misurender usab ang tulo ka miyembro sa Regional Sentro De Grabidad (RSDG) sa NEMRC ngadto sa 401st Infantry Brigade. Gitugyan nila sa militar ang usa ka carbine rifle, tulo ka magasin niini, ug 28 ka mga bala.
Matod sa militar, usa sa mga hinungdan sa pagsurender sa mga rebelde mao ang pagkaluya sa moral sa grupo human mapatay sa usa ka engkwentro niadtong Mayo 11 ang ilang lider nga si Edilberto Daval, nga nailhan sa mga alyas nga Bong, Waco, ug Bill.
Miingon si Colonel Glenn Joy U. Aynera, Acting Commander sa 401st Infantry Brigade, nga boluntaryong mitahan ang mga miyembro sa grupo ug mipadayag sa ilang suporta sa mga programa sa gobyerno alang sa kalinaw ug kalamboan.
Gidayeg usab ni Major General Michele B. Anayron Jr., Commander sa 4th Infantry Division, ang mga sundalo, kapulisan, lokal nga panggamhanan, ug mga komunidad nga nagtinabangay aron makab-ot ang kalampusan sa operasyon.
Matod niya, ang hingpit nga pagkabungkag sa NEMRC nagpakita sa pagkaepektibo sa mga operasyon militar, lig-on nga koordinasyon sa mga lokal nga panggamhanan, ug sa padayon nga suporta sa katawhan sa kampanya alang sa kalinaw ug seguridad.
Dugang pa niya, magpadayon ang gobyerno sa pagtabang sa mga kanhing rebelde pinaagi sa Enhanced Comprehensive Local Integration Program (E-CLIP) ug uban pang mga programa nga nagtumong sa ilang malinawon nga pagbalik sa katilingban.
Gilauman sa militar nga kini nga kalamboan makatabang sa pagpalig-on sa kalinaw, kaluwasan, ug malungtarong kalamboan sa tibuok rehiyon sa Caraga.
Photo courtesy: 401st Infantry Brigade
