Nasikop sa Marihatag Municipal Police Station ang Provincial Top 1 Most Wanted Person atol sa gilusad nga manhunt operation alas 2:30 karong hapona, Mayo 26, 2026.
Sumala ni PCPT Emil Santres Barro, Acting Chief of Police sa Marihatag Municipal Police Station (MPS), nadakpan ang suspetsado nga nailhan lamang sa alyas “Dongay,” 27-anyos, ulitawo, walay trabaho, ug residente sa Purok 2, Barangay Sta. Cruz, Marihatag.
Ang maong indibidwal giila isip Top 1 Most Wanted Person sa probinsyal nga lebel tungod sa kasong murder nga usa ka non-bailable offense.
Gibutyag sa kapulisan nga napahigayon ang operasyon pinaagi sa intelligence-driven manhunt operation human sa surveillance ug pag-validate sa impormasyon batok sa suspetsado.
Gidakop ang suspek pinaagi sa warrant of arrest nga gipagawas sa korte. Giingnan usab siya sa iyang katungod ubos sa Miranda Doctrine gamit ang pinulongan nga iyang nasabtan.
Sa pagkakaron, anaa na sa kustodiya sa Marihatag MPS ang nadakpan alang sa dokumentasyon ug hustong disposisyon.
Photo courtesy: Marihatag MPS
