Gipakusgan ang kampanya sa Davao de Oro Police Provincial Office (DDOPPO) batok sa Violence Against Women and Children (VAWC) aron mapanalipdan ang mga inosenteng sektor sa katilingban, ilabina ang mga kabataan ug kababayen-an.
Sa eksklusibong pakighinabi sa Juander Radyo Nabunturan News Team, gipatin-aw ni Police Colonel Cesario Dukiling Jr., Provincial Director sa DDOPPO, ang mga nag-unang balaod nga nagpanalipod batok sa pagpang-abuso sa kabataan ug kababayen-an. Gihisgutan usab niya ang kahinungdanon sa kahibalo sa publiko bahin niini aron malikayan ang paglapas sa balaod.-
Sumala pa kang PCOL Dukiling, nakarekord na ang ilang opisina og duha ka insidente sa pagpang-abuso nga naglakip sa kabataan ug kababayen-an, nga padayon nilang giatubang pinaagi sa tukmang aksyon ug imbestigasyon.
Sa katapusan, naghatag siyag pahimangno sa mga ginikanan nga ipadayon ang hustong pagdisiplina sa ilang mga anak pinaagi sa husto ug makatawhanon nga paagi. Gidasig usab niya ang pagpanudlo sa maayong pamatasan ug pagrespeto aron malikayan ang mga kaso nga may kalabutan sa VAWC.
