Dakpan ang usa ka 48-anyos nga lalaki sa gilusad nga joint anti-illegal drug operation sa Purok 7, Barangay Aplaya, Digos City. Gipahigayon ang operasyon sa City Drug Enforcement Unit sa Digos CPS ubos sa pamando ni PLTCOL Norman Yparraguirre, pinangulohan ni Police Captain June Mar Pasobillo kauban ang PDEA ug DSPO PDEU.
Ang nadakpan giila nga si alyas “To,” usa ka Street Level Individual (SLI). Atol sa buy-bust operation, mitunol kini og sachet nga adunay gidudahang shabu ngadto sa poseur buyer ug midawat usab sa marked money nga nagkantidad og 1K pesos.
Sa body search, nakuhaan pa kini og dugang duha ka sachet sa gidudahang shabu, usa ka cellphone ug coin purse. Nasayran nga kaniadto na sab nakagawas sa bilanggoan ang suspetsado ug namonitor pag-usab sa otoridad nga nalambigit sa pagpayuhot og ilegal nga droga sa maong barangay.
Sa kinatibuk-an, mokabat sa 4.47 gramos nga shabu nga adunay standard drug price nga kapin 30 mil pesos ang narekober sa operasyon.
