Mag-atubang karun sa kasong paglapas sa RA 9165 kun Comprehensive Dangerous Drugs Act of 2002 ang duha ka indibidwal human nadakpan sa gipatumang buy-bust operation sa mga otoridad pasado alas 03:00 sa kadlawon niadtong Mayo 20, 2026 didto sa Tinimbo, Barangay Poblacion, Cateel, Davao Oriental.
Ang mga dinakpan naila nga sila alyas “Ken-ken”, 26-anyos, mag-uuma ug alyas “Dan-dan”,41- anyos, usa usab ka mag-uuma ug pulos mga lumolopyo sa Sitio Cogon, Barangay San Rafael sa maong munisipyo.
Ang operasyon gikasa sa mga personahe sa Cateel Municipal Police Station, kauban ang PDEU DOPPO, PIU DOPPO ug lain pang law enforcement units ug nakuha gikan sa posisyon sa mga suspetsado ang 4 ka heat-sealed nga plastic sachet sa gituohang shabu ug usa ka PHP 500 nga kwarta nga adunay serial number AE611607.
Gipahibalo usab ang mga akusado sa rason sa ilang pagkasikop pinaagi na sa pinulongan nga ilang nasabtan ug nahibal-an. Sa kasamtangan ang duha ka suspek gikustodiya na sa Cateel Municipal Police Station alang sa hustong disposisyon.
Photo Courtesy: Cateel MPS
