Patay ang usa ka pedicab driver nga giilang si alyas”Berto” 27-anyos ug residente sa Sitio Malaihao, Brgy. P. Barrantes, Alangalang, Leyte, human kini gibuno sa suspek nga giilang si alyas “Bakol” 27-anyos ug residente sa naasoy nga lugar didto sa susamang lugar pasado alas 8:30 ang takna sa gabii niadtong nakalabay nga adlaw.
Sumala sa imbestigasyon sa Alangalang Municipal Police Station (MPS), sa wala pa ang insidente, nag-inom ang duha sulod sa balay sa biktima og nagkalalis nga meresulta sa mainit nga komprontasyon.
Gitoohan nga gilabog sa suspek ang mga plato ug uban pang gamit sa kusina sa wala pa kini mipauli sa ilang balay. Human sa komosyon, miadto ang biktima sa Barangay Hall sa Brgy. P. Barrantes aron magpablotter sa wala pa mibalik sa ilang balay.
Pipila ka minuto ang milabay, mibalik ang suspek sa balay sa biktima ug nangutana nganong gipablotter siya, dayon pugos nga misulod sa panimalay ug gipatay ang biktima.
Tungod sa kahadlok, midagan dayon ang live-in partner sa biktima ug nangayo og tabang sa barangay chairwoman. Sa iyang pagbalik, nakita na niya ang iyang live-in partner nga nagdugo ug wala nay timailhan sa kinabuhi.
Gideklarar nga patay ang biktima sa attending physician nga si Dra. Blesilda Abello-Aniceto, Municipal Health Officer sa Alangalang, Leyte.
Sa karon, padayon pa ang hot pursuit operation sa Alangalang MPS alang sa posibleng pagdakop sa suspek.
