Nagpagawas og labing bag-ong opisyal nga datos ang City Health Office (CHO) General Santos City kalabot sa sitwasyon sa pagpatambal sa mga indibidwal nga positibo sa Human Immunodeficiency Virus o HIV sa dakbayan.
Base sa rekord sa CHO as of March 2026, nakatala ang dakbayan og unom ka gatos ka mga pasyente nga anaa sa nagkadaiyang kahimtang sa pagpatambal. Sa kinatibuk-an, mosumada sa 1,543 ka mga indibidwal ang kasamtangang nagpaubos sa Anti-Retroviral Therapy (ART), nga nagpakita sa aktibong medikal nga interbensyon sa kagamhanan.
Bisan pa man, nagpabiling hagit alang sa mga otoridad sa panglawas ang 284 ka mga kaso nga nakalista isip ‘Lost to Follow Up’ o kadtong mga pasyente nga naputol ug wala na mibalik alang sa ilang padayong medikasyon ug monitoring.
Dugang niini, natala usab ang 50 ka mga pasyente nga nakabsan na sa kinabuhi (expired), samtang 3 ka indibidwal ang opisyal nga mihunong sa ilang pagpatambal (stopped treatment).
Subay niini, subling nagpahinumdom ang mga eksperto sa panglawas sa kamahinungdanon sa pagka-kunsistent sa pag-inom sa tambal aron mapugngan ang paglala sa maong impeksyon ug aron mapadayon ang normal nga kalidad sa kinabuhi sa mga pasyente.
