Patay ang usa ka estudyante human kining gipaulanan og kulata ug giingong gigukod pa sa usa ka grupo sa mga batan-on, sa Kidapawan City niadtong Domingo sa gabii. Giila ang biktima nga si Christian Jake Limasa Lebrillo, 20-anyos, residente sa Chapter, Barangay Poblacion, Magpet Cotabato.
Sumala sa inisyal nga imbestigasyon, siyam ka mga lalaki ang giingong nagtabang sa pagbunal sa biktima gawas sa usa ka imnanan. Human sa insidente, misulay pa og ikyas ang biktima pauli sa ilang panimalay, apan naaksidente sa Barangay Mateo nga miresulta sa iyang kamatayon.
Gitudlo usab sa report ang usa ka alyas Mack2, nga residente sa Barangay Ilomavis, ang giingong nanguna sa pagpangulata, samtang padayon pang giila sa mga awtoridad ang ubang nalambigit.
Nagbangutan karon ang pamilya sa biktima, asa ilang gipadayag nga naka-enrol na unta kini ug nangandam na para sa kolehiyo sa wala pa kini nahitabo.
Nagmando usab si Kidapawan City Mayor Atty. Jose Paolo Evangelista sa mga otoridad, nga paspasan ang imbestigasyon aron mapanubag ang mga responsable sa insidente.
Photo Courtesy: Christian Jake Limasa Librillo
