Andam na ang tanan alang sa Cebu Pickleball Open Tournament 2026: The Blazing Torch and True Edge Cup nga ipahigayon karong Hunyo 27 ning tuiga sa Net and Paddle Pickleball Area sa Barangay Sawang Calero syudad sa Sugbo.
Ang maong torneyo gipaluyohan sa Antorcha De La Libertad Lodge No. 2 ug Espada De Rectitud Lodge No. 3 ubos sa The Sovereign Grand Lodge of Visayas and Mindanao-Gran Logia Soberana del Archipielago Filipino.
Pormal nga gilunsad ang kalihokan atol sa press conference niadtong Mayo 13 Banawa Centrale.
Matod ni lead organizer Allan Borres Delantar, tumong sa torneyo ang pagpalig-on sa panaghiusa ug sportsmanship, pagtabang sa charitable ug humanitarian causes pinaagi sa fundraising, ug pagpalambo sa pickleball isip nagtubo nga duwa sa Sugbo ug kasikbit nga lugar.
Abli sa tanan ang one-day tournament nga adunay men’s doubles, women’s doubles, ug mixed doubles categories.
Ang kampiyon sa matag kategoriya makadawat og P10,000 samtang ang second placer makadawat og P7,000. Ang registration fee kay P1,500 matag player.
Giingon usab sa organizers nga ang matigom nga pondo gikan sa maong kalihokan igahin alang sa charitable ug humanitarian initiatives aron makatabang sa mga komunidad ug indibidwal nga nanginahanglan og suporta.
Photo Courtesy: CDN DIGITAL
