Nagpahigayon og Mother’s Day outreach activity Ang kagamhanan sa Probinsya sa Sugbo, pinaagi sa Gender and Development (GAD) Office, alang sa mga babayeng naapektuhan sa magnitude 6.9 nga linog niadtong Mayo 11 sa Barangay Hall sa Caduawan, lungsod sa Tabogon.
Ginganlan og “One-Stop Kalinga for Mothers,” ang kalihokan nagtigom og kapin 350 ka mga inahan, barangay health workers ug community workers alang sa usa ka adlaw nga adunay psychosocial support, legal assistance ug wellness services.
Usa sa mga tampok sa maong kalihokan mao ang “Kamusta Ka, Inahan?” psychosocial support session nga gipahigayon pinaagi sa Pantawid Pamilyang Pilipino Program sa Department of Social Welfare and Development.
Ang Provincial Legal Office, kauban si Atty. Jofre B. Recososa sa Recososa Law Firm, mipahigayon og libreng legal consultation samtang notarial services usab ang gihatag ni Atty. Marcelyn Urot.
Lakip sa mga legal nga serbisyo ang mga kabalaka may kalabotan sa kaminyoon ug pamilya, child support ug custody, mga pamaagi nga may kalabotan sa kaso sa violence against women and children, correction of entries sa birth certificates, affidavits, land titling ug partition, deeds of sale ug extra-judicial settlements.
Nakabenepisyo usab ang mga inahan sa libreng massage, haircut, manicure ug pedicure pinaagi sa Technical Education and Skills Development Authority ug Santo Niño Skills Development and Assessment Center Inc.
Matud pa sa Cebu Provincial Government, kabahin kini sa padayon nilang paningkamot sa pag-ila sa kusog ug kalig-on sa mga inahan samtang naghatag og tabang sa mga komunidad nga padayon pang nagbangon human sa linog.
Photo courtesy: Cebu Province
