Gisubli pagpakita sa Police Regional Office 8 (PRO-8), ang tinuod nga diwa sa “Serbisyong Mabilis, Tapat, at Nararamdaman” human sa dali nga paglihok sa mga personahe sa 2nd Northern Samar Provincial Mobile Force Company (2nd NSPMFC) aron madala ang donasyong breastmilk alang sa usa ka bag-ong natawo nga bata nga nanginahanglan dayon og tabang sa Catarman, Northern Samar niadtong milabay nga adlaw.
Ang donasyong breastmilk gikan kang Patrolwoman Maybelle Caballes, nga boluntaryong mihatag aron makatabang sa kahimtang sa bata. Dali usab kining gidala nila ni Patrolman Alex Allan Bonicarlo uban sa duha pa nila ka kauban aron masiguro nga maabot dayon ang tabang ngadto sa pamilya.
Ang maong lihok maoy pamatuod nga ang pagkaalagad sa balaod dili lamang nakapokus sa pagmintinar sa kalinaw ug kahapsay, kundili usab sa paghatag og malasakit ug makatawhanon nga serbisyo ilabi na sa mga labing nanginahanglan.
Dako usab ang pagpasalamat sa pamilya sa bata tungod sa paspas nga tabang ug pagpakabana nga gipakita sa kapulisan, nga matod pa nila dako kaayong kahupayan ug paglaom taliwala sa ilang giatubang nga sitwasyon.
Photo Courtesy:2nd NSPMFC
