Nagpahimangno ang MDRRMO Pantukan sa publiko nga mag-amping kanunay ug ipatuman ang “safety first.” Importante usab nga sigurohon nga hapsay ang kondisyon sa sakyanan, ilabina ang ligid, aron malikayan ang aksidente.
Gisaysay sa MDRRMO Pantukan atol sa pakighinabi sa Juander Radyo News Team pinaagi sa cellphone labot usa ka mangilngig nga road accident sa National Road, Barangay Tambongon, Pantukan, Davao de Oro niaging adlaw.
Base sa report sa usa ka concerned citizen, adunay nabangga nga L300 sa may crossing Tambongon. Ang maong hitabo gilayon nga girespondihan sa MDRRMO team. Sa ilang pag-abot sa lugar, naa na didto ang rescue vehicle nga unang nakaresponde sa insidente.
Sumala pa ni MDRRMO Marco Paolo Campaner Admin Aide/Responder base sa impormasyon gikan sa ospital, adunay upat ka bata ug tulo ka ginikanan nga naapektuhan sa aksidente.
Dugang pa sa assessment nga gihimo sa ospital, ang 7-anyos nga bata nga unang gidala nga adunay swelling sa ulo. Tungod sa iyang kritikal nga kahimtang, gideklarar siya og code blue, nga nagpasabot og grabeng sitwasyon nga nagkinahanglan og daliang medikal nga pag-atiman.
Nasayran nga mi-explode ang ligid sa sakyanan, hinungdan nga nawad-an og kontrol ang drayber ug nadiskrasya kini, hangtod nibangga sa center island sa dalan.
Alayon niini gipahinumduman ang tanan nga mag-amping ug magmatngon sa pagbiyahe sa kadalanan aron malikayan ang aksidente.“Ang kaluwasan sa dalan responsibilidad sa matag usa.”
