Nadakpan sa gilusad nga buy-bust operation sa Surigao del Sur Police Provincial Office (SDSPPO) ang usa ka High-Value Individual (HVI) nga drug personality sa Purok Mangga 2, Barangay Purisima, Tago, Surigao del Sur kagahapong adlawa, Mayo 1, 2026.
Giila ang suspek nga si alyas “Bodong,” 36 anyos, residente sa Brgy. Telaje, Tandag City, ug giila isip watchlisted pusher ug usa ka High-Value Individual (HVI) sa illegal nga droga.
Sumala pa sa Surigao del Sur Police Provincial Office nga pinangulohan ni PCOL Jeffrey Lawrence D. Mauricio, Provincial Director nga ang operasyon gipangunahan sa mga personahe sa Tago Municipal Police Station ubos sa pagpangulo ni PLT Michael G. Quisaot, Officer-in-Charge, uban sa koordinasyon sa Philippine Drug Enforcement Agency (PDEA).
Sa maong operasyon, narekober gikan sa suspek ang unom (6) ka heat-sealed transparent plastic sachet nga adunay gituohang shabu ug gibana-bana nga adunay gibug-aton nga 15 gramos ug kantidad nga mokabat sa ₱102,000.
Nasakmit usab gikan kaniya ang usa ka Smith and Wesson caliber .38 revolver nga walay serial number, ang gigamit nga buy-bust money nga ₱1,000, usa ka blue nga sling bag, usa ka blue Android cellphone, ug uban pang drug paraphernalia.
Karon, giatubang sa suspek ang kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.
