Gidakop ug karon nag-atubang og kasong robbery-holdup ang usa ka babaye human niya tulison ang usa ka STL teller sa Lapu-Lapu Extension, Digos City, alas 4 kapin sa hapon ,ning adlaw’ng Lunes,Mayo 4, 2026.
Gibana-bana nga 40-anyos ang suspek ug lumolupyo sa dakbayan sa Digos. Sumala sa imbestigasyon, gigamit sa suspek ang usa ka toy gun aron hadlokon ang biktima ug makuha ang cellphone niini.
Human makuha ang cellphone, mipahawa ang suspek ug mibaklay palayo. Apan gisundan siya sa biktima nga usa ka binabae. Sa dihang naobserbahan ug nasuta sa biktima nga dulaan ra diay ang pusil nga gigamit, wala kini maglangan—iyang gisuklan ang suspek ug gilayog kini.
Tungod sa maong aksyon, napugngan ang suspek nga makapalayo hangtod nga naabtan sa mga niresponding kapulisan sa Digos City Police Station.
Segon ni PLTCol Norman Yparaguirre, OIC sa Digos City Police Station, susihon nila kung bag-o lang ba ni nabuhat sa suspek o Ikapila na apan wala lang nareport kaniadto.
Sa pagkakaron, anaa na sa prisohan ang babayeng tulisan samtang padayon ang imbestigasyon sa kapulisan sa maong insidente.
