Gi-turnover sa lokal nga panggamhanan sa Kapalong ang kapin Php5.6 milyon nga kantidad sa upat ka mga proyekto sa Barangay Sua-on niadtong Abril 24, 2026, nga gipangunahan ni Mayor Edgardo L. Timbol uban sa partisipasyon sa mga residente ug opisyal sa barangay.
Lakip sa mga proyekto ang newly constructed stage sa Sua-on Elementary School nga nagkantidad og Php500,000, nga gilauman makatabang sa mga kalihokan sa eskwelahan, ug ang electrical supply sa Purok 13 nga nagkantidad og Php660,000 aron masiguro ang kasaligan nga suplay sa kuryente sa komunidad.
Gi-turnover usab ang concrete drainage system sa Sua-on National High School nga nagkantidad og Php500,000 aron malikayan ang pagbaha ug mapadayon ang kalimpyo sa palibot, samtang giablihan na usab sa publiko ang 120-metros nga hanging bridge sa Sitio Taguango nga nagkantidad og Php4 milyon aron mapalambo ang konektibidad ug kaluwasan sa mga residente.
Gipasiugda sa mga lider sa barangay ang ilang pasalamat sa mga proyekto nga mitubag sa panginahanglan sa katawhan, samtang gipadayag ni Mayor Timbol nga magpadayon ang LGU sa paghatag og mga inisyatibo aron masiguro ang padayon nga kalamboan sa tibuok lungsod sa Kapalong.
PHOTO COURTESY : KAPALONG INFOCENTER
