Gipadangat ni Marites Ricablanca, residente sa Purok 7, Bangcud, Malaybalay City, ang iyang kinasingkasing nga pasalamat human makadawat ang ilang pamilya og tabang pinansyal gikan sa mga miyembro sa Juander Radyo Loyalista Incorporated.
Kini nga suporta dako og natabang human mitaliwan ang ilang amahan nga si Winifredo Walo, kinsa nagserbisyo isip usa ka coordinator sa organisasyon.
Sa usa ka hamubo apan makatandog nga mensahe, gipadayag ni Ricablanca ang iyang lawom nga pagdayeg sa tabang ug pagtagad nga nadawat sa ilang pamilya. Matod pa niya, ang maong suporta gikan sa mga tawo nga naglibot kanila nagsilbing dakong kadasig ug kahupayan niining panahon sa ilang lawom nga kaguol.
Gihatagan usab og espesyal nga pagtagad ni Ricablanca ang aktibong papel sa Juander Radyo Loyalista. Sumala kaniya, ang organisasyon wala lamang naghatag og pinansyal nga ayuda, kondili nagpaabot usab og tinuod nga pagpakabana pinaagi sa pagbisita ug paghatag sa uban pang gikinahanglan nga suporta sa ilang pamilya, sama sa Php8 mil pesos cash, 1 sako sa bugas, bulak ug kape.
Isip panapos, iyang gipasalamatan ang maong organisasyon sa pagkahimong instrumento sa Ginoo aron mapagaan ang ilang gipas-an nga kalisod. Ang kadasig nga gipakita sa mga miyembro nagsilbing handumanan sa maayong serbisyo ug dedikasyon sa ilang mitaliwan nga amahan ngadto sa organisasyon.
