Gipasiugdahan sa Iligan City Traffic and Parking Management Office (ICTPMO) ang mas hugot nga pagdumala sa trapiko, ilabina batok sa kusog mopadagan nga mga sakyanan nga usa sa nag-unang hinungdan sa aksidente sa syudad.
Matod pa ni Ralph Oblenda, Department Head sa ICTPMO, naghulat pa ang ilang opisina sa alokasyon sa pondo alang sa pagpalit og speed gun—usa ka high-tech nga kagamitan nga gamiton sa pagmonitor sa mga overspeeding nga motorista.
Gipadayag niya nga dili basta-basta ang presyo niini tungod sa ka-advanced nga teknolohiya nga gigamit, apan nahisgutan na kini uban ni Darwin Manubag, City Administrator, ug gilauman nga maaprobahan ang budget sulod sa kasamtangang tuig.
Sa pagkakaron, duha pa lamang ka highways sa Iligan ang target butangan sa speed monitoring devices aron masugdan ang implementasyon sa speed limit sa syudad.
Nagpasidaan ang ICTPMO nga kini nga lakang kabahin sa mas lapad nga kampanya aron mapakunhod ang aksidente ug mapalambo ang kaluwasan sa kadalanan.
