Gidakop ang 47-anyos nga lalaki human nga nangdukol og kalaha sa iyang magulang nga babaye didto sa Relocation Site, Barangay Olingan, Dipolog City, Zamboanga del Norte niadtong milabayng adlaw.
Ang gisikop usa ka habal-habal driver, residente sa nasangpit nga dapit samtang ang maguwang nga biktima, 57-anyos, balo ug residente sa Barangay Opao, Dapitan City.
Sumala sa inisyal nga imbestigasyon sa kapulisan, ang suspect ug ang biktima nagkalalis atol sa haya sa namatay nilang amahan. Atol sa panaglalis mikuha ang suspect ug metal frying pan o kalaha sa kusina ug dayong dukol sa biktima igo sa iyang agtang sa makaduhang higayon nga maoy hinungdan nga nakaangkon kini ug injury sa agtang ug nawad-an sa panimuot.
Human sa insidente, nangayo ug pakitabang sa kapulisan ang biktima diin dali usab kini nga girespondehan ug nasikop ang suspect kinsa positibo nga gitudlo sa biktima ug mga nakasaksi ug gidala ngadto sa kustudiya sa Dipolog City Police Station ug giandam ang ipasaka nga kasong batok niini.
