Nipahigayon ang Land Transportation Office sa Central Visayas (LTO7) og surprise nga drug test sa Cebu South Bus ug North Terminal.
Kauban ang LTFRB-7, Philippine Coast Guard, PNP Cebu City, PDEA7, ug LTO Central Office sa maong kalihukan isip kabahin sa pagpahugot sa seguridad alang sa Semana Santa.
Sa CSBT, anaa sa 204 ka mga drayber ug konduktor ang gipaubos sa testing diin 5 ka bus driver ug 3 ka taxi driver ang nagpositibo samtang sa CNBT, anaa sab sa 208 ka mga indibidwal ang gipaubos sa drug testing diin usa ka taxi driver ang nagpositibo. Posibleng atubangon sa mga nagpositibo ang administrative ug legal nga silot subay sa balaod.
Segon ni PDEA7 Director Joel Plaza nga ang maong kalihukan gihimo inubanan sa koordinasyon sa kagamhanan sa Probinsiya sa Sugbo aron masiguro nga walay driver nga nagmaneho nga anaa ubos sa impluwensya sa illegal nga droga.
Samtang gihingusgan sab sa LTO7 nga magpadayon ang susamang operasyon sa rehiyon aron mapadayon ang luwas ug drug-free nga pampublikong transportasyon alang sa mga pasahero.
