Giklaro sa Provincial Social Welfare and Development Office (PSWDO) sa Surigao del Sur nga adunay “doble nga kantidad” ang mga armas nga gi-turnover sa mga kanhi myembro sa walhong grupo ilawom sa programa sa gobyerno.
Sa pakighinabi sa Juander Radyo News Team, gibutyag ni PSWDO Head Officer Hershe Nuñez, nga ang matag armas nga isurender pinaagi sa Enhanced Comprehensive Local Integration Program (E-CLIP) adunay katumbas nga ganti alang sa mga kanhi rebelde. Matod pa niya, dako kini’g tabang aron madasig ang uban pang myembro nga mobiya sa armadong pakigbisog sa kabukiran.
Dugang pa, ni Nuñez nga ang maong programa dugay na nga gipatuman, sukad pa sa administrasyon ni Former President Rodrigo Duterte nga usa sa mga inisyatiba sa gobyerno nga nagtumong sa pagtabang sa reintegrasyon sa mga kanhi rebelde balik sa komunidad.
Giingon usab niya nga pinaagi sa maong programa, daghang aktibong miyembro sa walhong grupo ang nadani nga motugyan sa ilang kaugalingon ug armas, uban ang paglaum nga makasugod og bag-ong kinabuhi uban sa suporta sa gobyerno.
