Gipangandaman sa Department of Education Caraga ang umaabot nga Palarong Pambansa 2026 nga gikatakdang ipahigayon dinhi mismo sa rehiyon sa Caraga.
Segon ni Pedro Tecson, ang tigpamaba sa DepEd Caraga nga bisan paman og bag-o lang nahuman ang Caraga Regional Athletic Games (CRAG) 2026, wala gihapon mohunong ang maong buhatan sa ilang pagplano aron masiguro nga magmalampuson ang nasudnong dula.
Gidala na usab sa DEPED Caraga ngadto sa National Secretariat ang tanang mga importanteng input ug obserbasyon nga ilang nakuha gikan sa bag-ohay lang natapos nga Regional Meet. Kini nga mga impormasyon magsilbing giya ug basehan sa National Secretariat sa paghimo og mga dagkong desisyon alang sa mas hapsay nga dagan sa Palarong Pambansa 2026.
Dugang pa sa tigpamaba, mahinungdanon kini nga mga insights aron mas mapalambo pa ang serbisyo ug pasilidad nga itanyag sa rehiyon ngadto sa mga atleta nga nag gikan sa nagkalain-laing dapit sa nasod.
