Dakpan og paslak na sa selda sa Trento Municipal Police Station ang duha ka suspetsado human sila nasikop pinaagi sa managlahing operasyon batok sa paglapas sa Republic Act 9262 o ang “Violence Against Women and Children Act.”
Gilunsad sa kapulisan sa Trento, ubos sa pagdumala ni PMAJ Martin L. Plaza III, ang maong operasyon niadtong nakalabay nga adlaw, diin unang nalit-ag ang usa ka 38-anyos nga hair stylist didto sa Purok-3, Poblacion, Trento kundiin wala na makapalag pa ang suspetsado sa dihang gisilbi sa mga otoridad ang warrant of arrest batok kaniya.
Gisundan kini sa laing malampusong pagdakop niadtong Marso 27, diin nasikop sab ang usa ka 30-anyos nga lemon harvester sa Purok-5, Poblacion sakop sa maong lungsod. Bisan pa man kon residente kini sa Pulanglupa, natultulan gihapon sa kapulisan ang nahimutangan sa akusado aron atubangon ang iyang kaso sa korte.
Nagpahinumdom si PMAJ Plaza III nga dili sila mohunong sa pagpangita sa mga malapason sa balaod aron masiguro ang kaluwasan sa mga inahan ug kabataan sa tibuok lungsod.
Nanawagan usab ang hepe sa publiko nga dili magpanuko sa pagreport sa bisan unsang matang sa pang-abuso aron mapadayon ang kahapsay ug kalinaw sa komunidad.
Photo courtesy: Trento MPS
