Nakatakdang ipahigayon dinhi sa probinsya sa Zamboanga Dle Norte ang “Serbisyong Pang-Trabaho Job Fair pinaagi sa pakigtambayayong sa Trabaho Partylist karong umaabot Abril 9 2026 sa may alas 9:00 sa buntag hangtod alas 4:00 sa hapon, didto sa Zamboanga del Norte Convention Center sa dakbayan.
Sumala sa mga tig-pasiugda, ang maong job fair nagtumong sa paghatag og daghang oportunidad sa trabaho alang sa mga residente sa probinsya. Nagkahiusa sa kalihokan ang nagkadaiyang ahensya sama sa Department of Labor and Employment (DOLE), Technical Education and Skills Development Authority (TESDA), ug Public Employment Service Office (PESO), uban sa ubang partner agencies.
Ang mga aplikante gi-awhag sa pagdala sa ilang resume ug uban pang kinahanglanong dokumento aron mas mapadali ang proseso sa aplikasyon. Anaa usab ang QR code nga mahimong i-scan ninyo aron makaparehistro daan ang mga interesadong moapil.
Pinaagi sa maong lakang, tumong ug tuyo sa mga tig-pasiugda nga mapalapdan ang oportunidad sa trabaho ug matabangan ang daghang mga taga-Zamboanga del Norte nga makakita og angay nga panginabuhian.
Photo Courtesy: ZN Provincial News Network
