Nihangyo og dugang manpower ug patrol units ang Cebu City Transportation Office (CCTO) ngadto sa kagamhanan sa dakbayan, human sa kakulang sa personnel ilabi na sa night operations.
Matod ni CCTO Head Raquel Arce nga limitado ang ilang kapabilidad, nga mitumaw human sa aksidenteng niresulta sa kamatayon sa usa ka delivery rider sa Gorordo Avenue, Barangay Lahug niadtong Marso 23.
Ang biktima, si Ivan Serintas Avila, 35-anyos, namatay dihang nadasmagan sa duha ka motorsiklo. Unang nabanggaan siya sa motor nga gimaneho sa 21-anyos nga adunay angkas nga 11-anyos, samtang nasundan pa kini og bangga sa laing motorsiklo nga gimaneho sa 16-anyos nga drayber nga miikyas dayon.
Gideklarar nga dead on the spot si Avila tungod sa grabeng kadaot nga iyang naangkon, samtang nasayran nga ang duha ka drayber wala’y driver’s license. Ang ikaduhang drayber misurender na sa kapulisan.
Sumala ni Arce, posible unta malikayan ang insidente kon adunay igo nga traffic enforcers nga nagpatuman og checkpoint niadtong orasa.
Sa pagkakaron, 415 ka personnel ang anaa sa CCTO, mas ubos sa target nga 600, ug daghan pa niini ang nadestino sa Cebu Bus Rapid Transit (CBRT), hinungdan nga upat na lamang ka teams ang nagdumala sa ubang lugar sa syudad, adlaw ug gabii.
Tungod niini, gihangyo ni Arce si Mayor Archival nga pun-an ang ilang personnel pinaagi sa job order, casual ug regular nga posisyon, ug usab magpalit og bag-ong patrol pickup units ilisan ang ilang mga sakyanan nga kapin na sa 10 ka tuig gigamit.
