Arestado ang tulo ka indibidwal sa gikinasa nga buy-bust operation sa kapolisan tungod sa ilegal nga pagbaligya og produktong petrolyo sa Davao del Sur.
Sumala sa Philippine National Police, nasakpan ang mga suspek nga nagbaligya og kapin 1,295 ka litro sa diesel ug 103 ka litro sa gasolina nga adunay kinatibuk-ang balor nga nagkantidad og ₱197,420.
Gidala dayon ang mga nadakpan ngadto sa Davao del Sur Maritime Police Station uban sa mga nakumpiskang ebidensya, samtang giandam na ang kasong ipasaka batok kanila.
Gipasiugda ni Jose Melencio Nartatez Jr. nga dili tugotan sa kapolisan ang mga indibidwal nga nagabusar sa kahimtang ilabina ubos sa State of National Energy Emergency.
Dugang pa niya, magpadayon ang ilang hugot nga pagbantay aron mapugngan ang mga nagapangwarta sa ilegal nga paagi ug mapanalipdan ang kaayuhan sa komunidad.
