Gitutokan ang mga plano ug programa sa nutrisyon sa mga kabataan ug pamilya sa Iligan City atol sa usa ka panagkatigum. Gihisgutan sa komitiba ang pagbisita sa mga lactation station sa nagkadaiyang opisina ug ahensya sa lokal ug nasudnong kagamhanan.
Tumong niini nga masiguro nga ang mga pasilidad alang sa mga inahan ug ilang mga anak anaa sa maayong kahimtang ug hapsay nga magamit. Lakip usab sa gipangandaman ang Search for the Best Garden for Go, Grow and Glow o G4.
Kini usa ka programa nga nag-awhag sa mga pamilya nga magkamugna og backyard gardening sa ilang panimalay nga adunay mga tanom nga makahatag og hustong nutrisyon. Dugang pa, gihisgutan usab ang Nutri Webby Award diin giaghat ang mga miyembro sa komitiba ug ang publiko nga suportahan ang ilang Facebook page.
Ang kadaghanon sa mga followers usa sa basehan aron makadaog sa maong pasidungog ug ang Iligan City Nutrition Committee padayon nga nagpaningkamot sa pagpalambo sa kahimtang sa nutrisyon sa komunidad. Ang komitiba gipangulohan ni Iligan City Mayor Frederick Siao isip chairman.
