Nagpagawas og pahimangno si Cebu City Councilor David “Dave” Tumulak batok sa delikadong pagtipig og gasolina ug uban pang flammable liquids sulod sa panimalay, ilabi na sa kasamtangang init nga panahon nga makadugang sa risgo sa sunog.
Gipasabot sa konsehal nga ubos sa Republic Act No. 9514 kun Revised Fire Code of the Philippines, hugot ang regulasyon sa pagtipig sa mga produktong petrolyo sama sa gasolina ug diesel.
Kon dili malikayan ang pagpalit og ginagmay nga kantidad, kinahanglan kini ibutang sa angay ug aprubadong sudlanan ug ipahilayo sa mga butang nga dali masunog aron malikayan ang disgrasya.
Bisan pa sa pagsaka sa tensyon sa Middle East nga hinungdan sa pagpangandam sa uban pinaagi sa pagtipig og petrolyo, gipahimangno ni Tumulak nga mas importante gihapon ang kaluwasan sa panimalay.
Samtang nagpadayon ang maong kahimtang, gihangyo usab ang Department of Energy nga palig-onon ang pagmonitor sa mga gasolinahan batok sa posibleng hoarding ug ilegal nga pagtipig sa suplay sa petrolyo.
