Napamatud-an sa Mayor sa Kidapawan City nga pwede pa usab mabag-o ang batasan ug kinaiya bisan pa kaniadto sila nailhan nga mga street fighters tungod kay karon, ang mga kabatan-onan nga kaniadto aktibo sa kagubot sa kadalanan, giila na ni Mayor Paolo Evangelista nga mga bag-ong environment warriors.
Nahitabo kini human gipatawag sa mayor sa iyang opisina ang mga ginikanan ug ang mga kabataan mismo nga nalambigit sa “ramble” sa duol sa usa ka pampublikong eskwelahan sa lungsod.
Sa atubangan sa alkalde, gidawat sa mga kabataan ang hagit dili isip silot kondili isip pagtuman sa programa sa City Government of Kidapawan sa paglimpyo ug subling pagbuhi sa Nuangan River.
Nisaad ang mga kabatan-onan nga maghimo sila ug regular nga clean-up kada bulan isip ilang kontribusyon sa programa nga “Save Nuangan River”.
Sa ilang bag-ong lihok, nakatapok sila og 29 kilos nga basura sa ilang unang clean-up drive. Gipasalamatan ni Mayor Pao ang mga ginikanan ug pamilya sa suporta nga ilang gipakita.
Photo Courtesy: CIO
