Gipasalig sa panggamhanang probinsyal sa Bukidnon nga ilang ginapaningkamotan nga magpabilin sulod sa lalawigan ang kita nga gikan sa Kaamulan Festival, pinaagi sa paghatag og prayoridad sa mga lokal nga concessioners.
Sumala sa pamahayag ni Cornelio Melan Cruz ang Head sa Events Committeesa Bukidnon, kadaghanan sa mga concessioners nga nagnegosyo sulod sa festival grounds gikan sa nagkadaiyang lungsod sa Bukidnon ug dili lamang limitado sa Malaybalay City ug Valencia City.
Gibutyag usab nga 98 hangtod 99 porsiyento sa mga concessioners nga nag-operate karon sa festival grounds mga taga-Bukidnon, isip kabahin sa paningkamot nga mapadayon ang paglihok sa lokal nga ekonomiya.
Matod pa sa mga opisyal, kung ang mga concessioners gikan sa Bukidnon, ang ilang kita magpabilin gihapon sa lalawigan.
Gipasiugda usab nga gawas sa negosyo, ang festival nagmugna og mga oportunidad sa trabaho tungod kay daghang concessioners ang nanginahanglan og mga trabahante alang sa ilang mga puwesto sa festival grounds.
Busa, giila nga ang Kaamulan Festival dili lamang selebrasyon sa kultura sa lalawigan kundili usa usab ka paagi aron mapalambo ang lokal nga ekonomiya ug makatabang sa panginabuhian sa mga residente sa Bukidnon.
Photo Courtesy: LGU Bukidnon
