Nasikop sa mga operatiba sa Criminal Investigation and Detection Group (CIDG) ang upat ka lalaki ug nasakmit ang kapin ₱4.5 milyon kantidad sa gituohang mineral sa operasyon batok iligal nga pagmina atol “Oplan Kalikasan” sa Brgy. Camagong, lungsod sa Nasipit, Agusan del Norte.
Base sa report, gipahigayon ang law enforcement operation pinaagi sa CIDG Regional Field Unit 13 kauban ang Provincial Mobile Force Company sa Agusan del Norte.
Sa maong operasyon, nadakpan ang upat ka suspek samtang giingong nagkupot, nagkontrol ug nagbiyahe sa copper ore minerals sakay sa duha ka heavy trailer trucks nga walay permit.
Lakip sa mga nasakmit mao ang 51 ka sako sa copper ore minerals, Gibanabana ang total kantidad sa ebidensiya sa ₱4,546,914.00.
Gidayeg usab sa CIDG leadership si PLTCOL Butch Ian C. Miñoza, Regional Chief sa CIDG RFU 13, ug ang mga joint operating units tungod sa malampusong operasyon.
Pasakaan ang mga suspek sa paglapas sa Republic Act 7942 o Philippine Mining Act of 1995, Section 53 (Ore Transport Permit), Section 110 (Other Violations), ug Section 103 (Theft of Minerals) sa maong balaod.
Giawhag sa CIDG ang publiko nga magpadayon sa pagreport sa mga iligal nga kalihokan nga makadaot sa kinaiyahan sama sa illegal mining, illegal quarrying, illegal logging ug uban pang paglapas aron maaksyunan sa kapulisan.
